– Ikkje heimel for å døma Erstad

– Erstad var innleigd som konsulent, og då er det ikkje heimel i lova for å døma han i denne saka, seier Torbjørn Kolås til Strilen.
Dette var ein av grunnane til at Kolås gjekk inn for full frifinning av Erstad då han hadde sitt sluttinnlegg i Vest Tank-rettssaka torsdag.

Nye stoff
Kolås meiner og at det i rettssaka er ført prov for at tankane i Sløvåg inneheldt fleire andre stoff enn det Erstad visste om då han gav sine råd om korleis avfallstoffet i tankane skulle handsamast.
– Det har kome fram at der var både MTBE, metanol, etanol og andre stoff, seier Kolås. Erstad har difor ikkje vist aktløyse, meiner han.

Nye teoriar
Kolås meiner og at det i rettssaka har kome fram vitneprov frå kjemiske ekspertar som dreg Økokrim sine teoriar om kva som utløyste eksplosjonen 24. mai 2007, sterkt i tvil. Dette bør og påverka dommen, meiner han.
Dette er ekspertise som Trond Emblem, eigar av Vest Tank og den eine tiltalte i saka, har leigd inn og betalt av eiga lomme.

Rettstryggleik
I Bergens Tidende i går gjekk Emblem sin advokat Per Magne Kristiansen ut og hevda at det er eit trugsmål mot rettstryggleiken at tiltalte sin privatøkonomi skal ha innverknad på utfallet av ei sak.
Kristiansen gjekk også inn for full frifinning av sin klient.
Rettssaka vart avslutta torsdag. Det vil truleg gå nokre veker før dommen fell, og mykje tyder på at saka vert anka uansett utfallet av dommen.