Vil ikkje flytta barnehagen

Bølgjene rundt barnehagen i Eivindvik har ikkje lagt seg, sjølv om eit fleirtal i kommunestyret før jul bestemte at den nye barnehagen skal koma i/ved skulen.
I eit felles brev til kommunen skriv foreldregruppa i barnehagen, Eivindvik UL og Eivindvik/Gulen Sanitetslag at den beste løysinga vil vera å byggja barnehagen på tomta der barnehagen ligg no. Her er borna kjende, og det ligg nær det uteområdet som borna brukar i dag.

Billegare
Brevskrivarane trur også at ei slik løysing vil verta den rimelegaste. Tomta ligg dessutan sentralt, med kort veg til bibliotek, båthamn og sentrum.
Eivindvik Ungdomslag tilbyr kommunen å bruka ungdomshuset Vårtun som barnehage i byggjeperioden.
I brevet vert det påpeika at dei andre barnehagane i kommunen ligg i sjølvstendige bygg sjølv om dei ligg like ved skulane. Ei slik løysing må også utgreiast i Eivindvik, viss kommunen ikkje vil byggja på noverande tomt.
Difor ber underskrivarane om at når arkitekt skal laga skisser og kostnadsoverslag for den nye barnehagen, må ei løysing med barnehage i eige bygg vera eitt av alternativa.

Færre plassar
I eit eige brev har Bjørg Undertun på vegner av dei tilsette påpeika at tilhøva i barnehagen i dag er svært lite tilfredsstillande. Der er altfor lite plass, og der er mykje støy.
«Slik vi har det no, føler vi sterkt på at Eivindvik barnehage er ein opphaldsstad for barna», heiter det i brevet.
Og vidare: «Dette er ei skam for den politiske leiinga at dei ikkje tek ansvar for barna og dei tilsette på denne arbeidsplassen».
Undertun føreslår at som ei mellombels løysing vert talet på plassar redusert frå 32 til 26.

Løysing
– Me har denne veka hatt møte med kommunen, der me har funne fram til ei løysing slik at me slepp å redusera talet på plassar, fortel styrar i barnehagen Mona Midtun til Strilen.
Det inneber at bemanninga på avdelinga på Haveland vert auka opp, slik at dei kan ta imot fleire born der.
Elles stiller ho seg fullt ut bak brevet frå dei tilsette når det gjeld situasjonen i barnehagen i dag og behovet for at noko vert gjort.